Mae’r comedïwr arloesol sydd wedi ennill sawl gwobr, Paul Foot, yn ôl ar daith gyda Dissolve, ei sioe fwyaf personol, syfrdanol ac arloesol erioed. Mae Paul i’w weld ar Would I Lie To You?, Never Mind the Buzzcocks ac 8 Out of 10 Cats Does Countdown.

Fe gawson ni sgwrs gydag o i gael gwybod mwy am beth i’w ddisgwyl o’i sioe...

Rydyn ni mor gyffrous am eich cael chi yng Ngŵyl Gomedi Wrecsam. Ydych chi wedi perfformio yn Wrecsam / Gogledd Cymru o'r blaen?

Fel y rhan fwyaf o gomedïwyr, rydw i wedi bod ym mhobman bron ledled y wlad dros y blynyddoedd. Rydw i wedi perfformio yn Wrecsam a hefyd wedi gwneud rhywfaint o ffilmio unwaith mewn parc carafanau yn y Rhyl, lle cefais i a'r criw ffilmio ein bygwth gan garafaniwr am 7 y bore gyda pheiriant strimio. Fe ddylwn i nodi, er bod hyn wedi digwydd yng Ngogledd Cymru, nad Cymro wnaeth ein bygwth ni. Mae’r Cymry’n bobl groesawgar iawn a dydyn nhw byth yn bygwth pobl gyda pheiriant strimio – mae’n well ganddyn nhw fygwth pobl gyda maip neu lefel saer mewn ystum ymosodol.

Beth allwn ni ei ddisgwyl o'ch sioe chi Dissolve?

Fe allwch chi ddisgwyl siwrnai syfrdanol ac emosiynol i 'ngorffennol i, yn ogystal â hiwmor Eifftaidd hynafol, a sôn am yr hyn y byddai’r Iesu wedi'i gyflawni pe bai wedi cael bod yn blymar.

Pa un yw eich perfformiad mwyaf cofiadwy chi, boed dda neu ddrwg, a pham?

Rai blynyddoedd yn ôl, fe wnes i sioe yng Nghaeredin mewn pwll nofio. Do, rydych chi wedi darllen hwn’na'n gywir! Yng Nghaeredin mae pob cwpwrdd yn dod yn lleoliad yn ystod gŵyl y Fringe, ac eleni fe benderfynodd pwll mewn gwesty y byddai’n elwa. Roedd y cyflwynydd a'r perfformwyr yn gwneud eu comedi yn y dŵr, a'r gynulleidfa’n eistedd ar yr ochr. Yn anffodus, a dydi hyn ddim yn syndod, doedd y syniad yma ddim yn addas iawn ar gyfer perfformiadau comedi a phan wnes i gyrraedd, roedd y cyflwynydd yn cael yr hyn y mae’n rhaid i mi ei disgrifio fel chwalfa nerfol. Cyn fy nghyflwyno i, fe soniodd ei bod wedi diflasu ar wneud y sioe, ac am rai o anfanteision amlwg perfformio mewn pwll. Meddai hi, “Roeddwn i'n meddwl y byddai'n syniad gwych cael sioe mewn pwll nofio, ond dydi hi ddim wir yn gweithio. Rydw i wedi bod yn gwneud hyn ers 3 wythnos bellach, a fedra i ddim cymryd dim mwy. Nawr, wnewch chi groesawu Paul Foot.” Wedyn fe es i 'ar y llwyfan' a gwneud fy act, gan geisio gwneud pethau’n well, tra oedd y cyflwynydd yn crïo’n gwbl agored yn y pwll padlo. Roedd yn chwithig iawn. Roeddwn i eisiau i'r llawr agor a fy llyncu i, ond mewn ryw ffordd, mae’n debyg ei fod wedi gwneud hynny eisoes.

Yr halen ar y briw y diwrnod hwnnw oedd mai hon oedd y 18fed sioe i mi ei pherfformio yn ystod y diwrnod, gan fy mod i’n ceisio torri record y byd am y nifer fwyaf o sioeau comedi i gael eu perfformio mewn 24 awr. Fe wnes i dorri’r record, drwy wneud 25 sioe i gyd, ond fe wrthododd pobl Guinness World Record y record oherwydd rhesymau iechyd a diogelwch. Mae'n debyg y byddwn i wedi gallu taro i mewn i rywun yn rhuthro rhwng y sioeau, felly roedd fy ymgais i am record yn cael ei ystyried yn rhy beryglus i gynhyrchwyr Guinness fod ag unrhyw beth i'w wneud ag ef. Mae hyn er gwaetha’r ffaith eu bod nhw wedi caniatáu yn gwbl hapus i ddyn roi 13 o nadroedd yn ei geg. Eto i gyd, mae'n debyg ei fod o wedi gwneud asesiad risg yn lle cerdded yn gyflym ac yn gwbl naïf drwy Gaeredin heb y gwaith papur perthnasol.

Dywedwch rywbeth wrthyn ni na fydd eich cynulleidfa chi’n ei wybod amdanoch chi?

Rydw i'n caru pryfed cop. Unwaith roeddwn i'n perfformio sioe ac fe stopiodd y gynulleidfa chwerthin ac roedd yn amlwg bod rhywbeth yn tynnu eu sylw. Fe wnes i ofyn iddyn nhw beth oedd yn bod a chael gwybod bod pry copyn mawr yn y theatr oedd yn dychryn rhai pobl. Fe wnes i godi’r pry copyn a'i roi allan drwy'r ffenest ac fe aeth y sioe yn ei blaen yn ddidrafferth. Yr hyn doedd y gynulleidfa ddim yn ei wybod oedd fy mod i wedi methu â’i roi allan yn iawn drwy’r ffenest ac fe dreuliodd y pry copyn weddill y perfformiad yn cropian i fyny ac i lawr fy llawes i. Doedd dim ots gen i. Roedd mor gyfeillgar.

Oes yna jôc neu sgets y byddech chi wedi hoffi ei hysgrifennu?

Fe fyddwn i wedi hoffi ysgrifennu sgets Mastermind y Two Ronnies. Mae mor glyfar ac mae'n rhaid ei bod wedi cymryd oesoedd i roi trefn ar resymeg fewnol y sgets, gyda darnau o bapur ar hyd y llawr ym mhobman - fy hoff fath i o ysgrifennu. Un ffaith ddibwys ydi bod fersiwn ysgrifenedig o'r sgript ar-lein sydd, mewn gwirionedd, yn welliant ar y fersiwn gafodd ei ffilmio. Nid bod hynny’n bwysig wir. Mae’r sgets mor llawn o linellau a jôcs gwych fel mai dim ond pedant fel fi fyddai’n sylwi.

Beth am berfformio'n fyw sy'n gwneud i chi ddychwelyd dro ar ôl tro i'r llwyfan?

Dydw i ddim yn gallu meddwl am unrhyw beth arall i'w wneud fel bywoliaeth.

Unrhyw gyngor i bobl sydd eisiau dechrau yn y byd comedi neu sydd mewn cyfnod cynnar yn eu gyrfaoedd?

Canolbwyntiwch ar wella eich sioeau salaf a bydd eich perfformiadau gorau yn gofalu amdanyn nhw’u hunain. Dibynadwyedd ydi eich allwedd chi i lwyddiant.

Ac yn olaf, beth sydd ar y gweill ar gyfer gweddill y flwyddyn / 2025?

Rydw i'n disgwyl y bydda’ i’n gwneud yr 80 neu 90 neu fwy o berfformiadau o Dissolve sydd wedi'u trefnu eisoes neu sy'n debygol o fod, ac wedyn, ar ôl hynny, rydw i'n meddwl y caf i orwedd i lawr.

I archebu tocynnau Gŵyl Gomedi Wrecsam cliciwch yma.